Nina Mchumba wa Ndoa, Lakini Nimempa Mimba Msichana Mwingine — Nifanye Nini?

Naomba Ushauri

Nina Mchumba wa Ndoa, Lakini Nimempa Mimba Msichana Mwingine — Nifanye Nini?

Jina la mtumaji limefichwa kwa ajili ya kulinda faragha yake.

Habari yenu ndugu zangu.

Mimi nina mchumba wangu toka mwaka juzi. Tupo kwenye uchumba na mwakani tumepanga kufunga ndoa.

Mwaka jana mwezi wa sita nilipata transfer nikahamia mkoa mwingine. Sikuweza kuhama na mchumba wangu kwa sababu hatukuwa tunaishi pamoja, na yeye alikuwa na shughuli zake anafanya.

Mwezi wa tisa nikakutana na binti mwingine. Mazingira yalifanya tubadilishane namba, tukaanza kuwasiliana na hatimaye tukaingia kwenye mahusiano ya siri. Kadri siku zilivyokuwa zinaenda, mapenzi yakaanza kukolea.

Wiki iliyopita alianza kuniambia anajisikia vibaya, mara kichwa, mara kichefuchefu, mara tumbo. Majuzi ameenda kupima, ameambiwa ana ujauzito wa wiki mbili kasoro, na kwa hesabu nilizopiga inawezekana kabisa ni mimba yangu.

Nipo nawaza mchumba wangu itakuwaje. Ananipenda, nami nampenda. Hajanikosea. Anajua kabisa lazima nitamuoa. Lakini huku binti mwingine naye tayari ana ujauzito, na ananipenda sana.

Binti amesema mimba hatoi, na mimi pia sitaki aitowe. Kibaya zaidi anataka kupajua kwetu na kuwajua ndugu zangu ili ikitokea lolote ajue pa kuanzia.

Mchumba wangu naye siku hizi ananipigia simu na kunitumia meseji karibu kila muda. Sijui kama kuna kitu amehisi. Kosa kubwa nililofanya ni kwamba sikumwambia huyu binti kuwa nina mchumba na tayari tuna mpango wa kufunga ndoa.

Naomba ushauri nifanye nini katika hali hii. Nataka kucheza fair. Mtumaji: Imefichwa

Asante kwa kuwasiliana na Maarifa360. Hili ni jambo zito linalohitaji ukweli, uwajibikaji na maamuzi ya heshima kwa wote walioguswa. Maarifa360

Ushauri wa Maarifa360

Kwanza, unatakiwa kukubali kuwa hili si tatizo la bahati mbaya tu, bali ni matokeo ya maamuzi uliyoyafanya ukiwa tayari kwenye uchumba unaoelekea kwenye ndoa. Kukubali hilo ndiyo hatua ya kwanza ya kuwajibika.

Kama kweli ujauzito ni wako, una wajibu wa kusimama kama baba. Mtoto anayekuja hana kosa lolote, hivyo suala la afya ya mama, matunzo ya ujauzito na maandalizi ya mtoto linahitaji kuchukuliwa kwa uzito.

Pili, usiendelee kujificha. Mchumba wako ana haki ya kujua ukweli kabla ya kuingia kwenye ndoa. Kuendelea kuficha jambo hili kunaweza kufanya maumivu yawe makubwa zaidi siku ukweli utakapojulikana.

Tatu, usitoe ahadi kwa binti mwenye ujauzito ambazo hujui kama unaweza kuzitimiza. Usimwambie maneno ya kumtuliza tu wakati ndani yako hujajua msimamo wako. Ongea naye kwa heshima, eleza ukweli wa hali yako, na mthibitishie kuwa mtoto hatatelekezwa.

Nne, usifanye haraka kuamua nani umuoe kwa sababu ya hofu au presha. Ndoa haiwezi kujengwa kwa kuficha ukweli, huruma pekee au kulazimishwa na mazingira. Lazima kuwe na ukweli, uwajibikaji na maamuzi ya wazi.

• Mweleze mchumba wako ukweli mapema kabla hajaujua kwa njia nyingine.
• Zungumza na binti mwenye ujauzito kwa heshima na uwazi.
• Usikimbie majukumu ya mtoto kama mimba ni yako.
• Washirikishe watu wazima wenye busara kutoka familia au viongozi wa kiroho kama mna imani.
• Simamisha maandalizi ya ndoa kwa muda mpaka hali hii iwe wazi na maamuzi yafanyike kwa ukweli.

Somo la Maarifa360

Ukweli unauma, lakini uongo unaumiza zaidi ukichelewa. Ukisema ukweli sasa, unaweza kupoteza vitu fulani, lakini utabaki na heshima ya uwajibikaji. Ukificha, unaweza kuharibu maisha ya watu wengi zaidi.

Una changamoto inayokusumbua?

Tuma swali lako kwa Maarifa360. Jina lako halitawekwa hadharani.

Tuma Swali Lako