TONE LA LAANA : SURA YA NNE
Tone la Laana
Asubuhi iliyofuata, chumba cha matibabu cha monasteri kiligeuka kuwa uwanja wa mshtuko mkubwa kabisa wa kimatibabu. Dr. Miller, akiwa pamoja na nesi mwandamizi wa Kizungu, alifanya uchunguzi wa kina wa maungo ya Sista Clare ili kuthibitisha ukweli wa madai yake.
Matokeo yalimwacha daktari huyo akitetemeka mikono! Pazia la ubikira la Sista Clare lilikuwa salama kabisa—halikuguswa wala kubadilika kwa namna yoyote ile. Kisayansi, ilikuwa ni muhali kabisa mwanamke huyo kuwa amekutana na mwanamume kimwili. Lakini wakati huo huo, vipimo vya tumbo viliendelea kuonyesha uwepo wa kiumbe hai kinachokua ndani yake!
"Hii ni ajabu ya dunia..." Dr. Miller alinong'ona huku akivua miwani yake na kuipangusa kwa kitambaa. "Mwili wake haujawahi kumjua mwanamume, lakini ana ujauzito. Sijawahi kuona jambo kama hili katika maisha yangu yote ya udaktari!"
Habari hizo hazikubaki ndani ya chumba hicho pekee. Kama upepo wa dhoruba unavyosambaza moto katika msitu mkavu, minong'ono ilitanda kwa kasi ya ajabu ndani ya kuta za Monasteri ya Gare.
Kipindi cha chakula cha mchana, ukumbi mzima wa chakula ulikuwa na msisimko wa tofauti. Masista walikusanyika makundi kwa makundi, nyuso zao zikiwa zimejaa hamaki, hasira, na sintofahamu.
"Huu ni uchawi au uasherati wa waziwazi!" Sista Martha, mtawa mzee aliyekuwa na sauti ya kukemea, alinong'ona kwa hasira huku akikata kipande cha mkate. "Binti huyu anataka kutuletea laana! Sasa hivi anasingizia Mungu kuwa amemfanyia muujiza kama Bikira Maria? Hili ni kashfa kubwa kwa Kanisa!"
"Tena anapaswa kufukuzwa na kuvuliwa shela mara moja!" Sista Beatrice aliongezea kwa hamaki. "Anatudhihaki masista wenzake tunaolinda usafi wetu usiku na mchana. Mwongoni huyu!"
Wakati minong'ono hiyo ikipamba moto, mlango wa ukumbi ulifunguka. Sista Bernadette alitokea hapo, akitembea kwa hatua za haraka, macho yake yakiwa yameiva kwa hasira. Alipowasikia masista hao wakimnyoshea kidole Sista Clare, alishindwa kujizuia kabisa!
"Hivi ninyi hamna hata hofu ya Mungu ndani ya nyoyo zenu?!" Bernadette alipayuka kwa sauti kubwa, akipiga meza ya mbao kwa kishindo kilichofanya sahani na vikombe vitikisike. Ukumbi mzima ukakaa kimya rasmi!
"Sista Bernadette! Unakosa nidhamu!" Sista Martha alikemea.
"Nidhamu gani mbele ya uzushi wenu?" Bernadette alitokwa na povu, akijishika kiuno kwa vituko vyake vya kawaida. "Clare ni msafi kuliko hata maji ya kisima cha Gare! Nani hapa kati yenu anayesali masaa sita mfululizo kama Clare? Nani hapa anayefunga kula siku tatu bila kulalamika? Sasa ikiwa Daktari wa Kizungu mwenyewe amesema hajawahi kuguswa na mwanamume, ninyi ni kina nani hata mmhukumu? Au ninyi ndio mlikuwa mnamshikilia taa usiku?!"
Kilio cha mshtuko kikawatoroka masista kadhaa kwa maneno hayo ya Bernadette. Lakini Bernadette hakujali. Alichukua sahani mbili za chakula na kopo la supu ya moto, akaanza kutoka kwa hatua za kibri ili kumpelekea rafiki yake aliyekuwa amefungiwa katika chumba cha maombi.
"Bernadette! Rudi hapa!" Sista Beatrice alimfokea.
"Sitaki! Nenda kakoroge supu yako yenye chumvi nyingi!" Bernadette alijibu bila hata kugeuka, na kufanya baadhi ya masista wadogo kujiumata mdomo ili wasicheke kwa sauti.
Bernadette alipofika mlangoni mwa chumba cha Sista Clare, alikuta mtawa mmoja mlinzi amesimama mlangoni kwa amri ya Mama Mkuu.
"Huruhusiwi kuingia ndani, Sista Bernadette," mlinzi huyo alisema kwa utulivu.
"Nisogee kando wewe kabla sijakumwagia hii supu ya moto ya mboga za majani!" Bernadette alitisha huku akijifanya kama anataka kuinua kopo. Mlinzi huyo alishtuka na kurudi nyuma hatua mbili kwa hofu ya vituko vya Bernadette, na papo hapo Bernadette akautega mlango kwa mguu na kuingia ndani kwa kasi!
Ndani ya chumba hicho kidogo, Sista Clare alikuwa amepiga magoti sakafuni, akilia kwa sauti ya chini, sanamu ndogo ya Bikira Maria ikiwa mikononi mwake.
"Clare wangu..." Bernadette alisema kwa huruma, akiweka chakula chini na kumkumbatia rafiki yake kwa nguvu. "Usilie myangu. Mimi naamini usafi wako. Hata kama dunia nzima ya Gare itakugeuka, mimi nitasimama nawe hadi mwisho!"
"Berny... inasikitisha sana," Sista Clare alinong'ona kupitia machozi. "Hawaniamini... wanafikiri nimemsaliti Yesu. Lakini naapa, sijawahi kukutana na mwanamume yeyote!"
"Wacha waseme, midomo ni yao lakini roho ni yako!" Bernadette alisema kwa msisitizo huku akimfuta machozi. "Kama ni muujiza, basi wacha uwe muujiza. Na kama kuna mchezo mchafu ulingoni, Mungu atauweka wazi tu!"
Lakini mbali kidogo na chumba hicho cha maombi, hofu ya kweli haikuwa kwa masista pekee. Kule nyuma ya jengo kuu, karibu na mabanda ya nguruwe, kijana Kassim alikuwa amekaa juu ya gogo la mti, mikono yake ikitetemeka vibaya mno.
Alitazama askari wa kikoloni waliokuwa wamewasili monasterini kufuatia wito wa dharura wa Mama Mkuu. Kassim alijua wazi kuwa uchunguzi ukianza rasmi na kubaini ukweli wa maji yale ya bafuni, maisha yake yatakuwa hatarini kabisa!